Rauðhetta var sett upp í leikskólanum hjá Kára.

Matthías lék úlfinn. Hann lagði mikið í hlutverkið, gerði sitt til að vera hræðilegur, en Kári telur samt að hann hafi ekki verið mjög hræðilegur. Fannst hann líkari kisu en úlfi. Matti var með gráa sokka á höndunum; þannig túlkaði hann loppur úlfsins.

Ilmur lék Rauðhettu. Hún var í rauðri kápu.

Rannveig lék ömmuna. Hún var með grænmálaðar augnabrúnir. Rannveig vildi frekar leika prinsessu svo þetta var eins konar ömmuprinsessa.

Viktor var veiðimaðurinn. Hann var nokkuð sannfærandi í hlutverkinu, enda hafði forláta skegg verið málað á andlit hans.

Þegar allt kemur til alls var þetta ágæt leiksýning og hafa spunnist af henni miklar umræður.