Sjálfstæðismenn hljóta að vera á fullu að reyna að takast á við hinn nýja veruleika í borgarpólitíkinni. Hversu lengi á Ólafur F að sitja sem borgarstjóri – fær hann heilt ár? Þá verður ríflega eitt ár til kosninga. Ætla þeir að leyfa Vilhjálmi Þ. að taka við eða setja þeir einhvern annan í djobbið, framtíðarmanneskju, einhvern sem gæti leitt flokkinn í kosningar og eftir þær?

Hönnu Birnu? Gísla Martein? Kjartan? Einhvern annan?

Svo þarf að huga að atkvæðunum. Byrjun nýja meirihlutans er svo hörmuleg – traustið á honum er svo lítið – að það hlýtur að þurfa meiriháttar herferð til að ganga í augun á kjósendum. Það þýðir væntanlega mikla athafnasemi, miklar framkvæmdir, mikil útgjöld. En tíminn er ekki mikill.

Tækifærin eru fyrir hendi, en innanflokksátök gætu skemmt fyrir. Það þarf enginn að segja manni að sé gróið um heilt milli Vilhjálms og Gísla og Hönnu. Og svo er ekki víst að samstarfið við Ólaf verði dans á rósum. Miðað við fyrri reynslu er eiginlega öruggt að svo verður ekki.