Þarf ekki að taka einhverja alvöru ákvörðun um álver í Helguvík? Eða ef menn líta svo á að hún hafi þegar verið tekin – að standa þá við hana.

Það er dálítið raunalegt að sjá umhverfisráðherrann (og Dofra Hermannsson og Mörð Árnason) reyna að þæfa málið. Þessi togstreita milli Árna Sigfússonar og Samfylkingarinnar er ekki góð stjórnsýsla.

Margir ráðherrar Sjálfstæðisflokksins – þar á meðal Geir Haarde – hafa lýst því yfir að þeir vilji að álver verði byggð til að fleyta þjóðinni yfir komandi efnahagsþrengingar.

Annað hvort gefur ríkisstjórnin út að hún vilji að álverið rísi eða hún tekur af skarið og segir að það sé henni á móti skapi.

Er ekki líka fáránlegt að fara ekki fram á meiri losunarkvóta? Meira að segja vinurinn Zizek sagði í viðtali við Viðskiptablaðið að við yrðum að hugsa hnattrænt um umhverfismálin en ekki bara út frá „dalnum okkar“.

Sjálfur fór ég í bíltúr um Suðurland á sunnudaginn. Það er ekki ofmælt að þar vellur hrein orka undan öðrum hverjum steini.