Nú vilja Færeyingar ganga í EFTA. Það er sósíalistinn Högni Hoydal sem beitir sér fyrir því.

Þá má rifja það upp að á Íslandi var hart tekist á um inngönguna í EFTA á síðustu árum viðreisnarstjórnarinnar. Það var talað um sjálfstæðis- og fullveldismissi.

En inn fórum við árið 1970. Þá voru Austurríki, Bretland, Danmörk, Noregur, Portúgal, Svíþjóð og Sviss aðilar að samningum, en Finnland, Lichtenstein og Ísland komu síðar.

Ég var barn þegar þetta gerðist. Fylgdist reyndar ágætlega með fréttum og man eftir hatrömmum deilum. Maður fann þó aðallega fyrir breytingunni þegar erlent sælgæti fór að fást í búðum. Áður hafði legið blátt bann við innflutningi þess. Maður varð að gera sér krembrauð og kókosbollur að góðu.

Þó voru vissar sjoppur í bænum þar sem sagt var að væri selt smyglað Mackintosh undir borðið.

Nú eru einungis Ísland, Noregur, Lichtenstein og Sviss eftir í EFTA. Þrjú fyrrnefndu löndin eru aðilar að EES-samningnum.

Þótt Belgía sé ekki meðlimur fer starfsemi EFTA að miklu leyti fram í Brussel – vegna nálægðarinnar við Evrópusambandið. Það vakti athygli þegar Geir Haarde forsætisráðherra var á ferð í Brussel nýlega að hann tók ekki tíma til að heimsækja skrifstofur EFTA.