Erkibiskupinn af Kantaraborg sagði óhjákvæmilegt að sharialög myndu gilda í Englandi.

Fjölmiðlar í Bretlandi loga vegna þessa, kirkja biskupsins hefur risið upp á móti honum.

Kannski á að þakka manninum fyrir hreinskilnina, en mörgum finnst hann samt vera kjáni.

Erkifífl.

Aðalatriðið er að það skulu gilda ein lög í landi:

Það er ekki hægt að sætta sig við fjölkvæni.

Það er ekki hægt að sætta sig við hvernig er tekið á skilnaðarmálum í sharia.

Það er ekki hægt að sætta sig við réttleysi kvenna innan þess.

Það er ekki hægt að sætta sig við nauðungarhjónabönd.

Það er ekki hægt að sætta sig við að karlaveldi fái óheft að svipta konur frelsi með því að neyða þær til að hylja sig frá hvirfli til ilja.

Mannréttindadómstóll Evrópu úrskurðaði árið 2004 að sharialög væru ósamrýmanleg lýðræðinu.

Það hefur komið fram shariadómstólar eru þegar farnir að starfa í Bretlandi. En það er ekki rétt að þeir fjalli bara um fjölskyldumál og deilur um peninga, heldur eru líka að koma í ljós tilvik þar sem þeir dæma í ofbeldisbrotum innan innflytjendasamfélaga.

Og þar sem glæpamennirnir hafa ekki þurft að gera annað en að greiða sekt.

Með þessu er grafið undan lögum landsins; það endar með því að samfélagið molnar í sundur.

Stefnan á að vera að minnka hlut trúarbragðanna á hinu veraldlega sviði – ekki auka hann. Það er best fyrir alla, líka þá sem trúa – og geta iðkað trú sína í friði.