Anna Ólafsdóttir spyr á bloggi sínu hvort það sé gamla hugmyndin „auga fyrir auga, tönn fyrir tönn“ þegar Ísraelar ráðast af hörku á Gazasvæðið eða hvort þetta sé strategía.

Svarið er strategía.

Um það má lesa í mjög fróðlegri bok eftir ísraelska sagnfræðinginn Avi Shlaim sem nefnist á ensku The Iron Wall. Járnveggurinn er stefna sem stofnendur Ísraelsríkis tóku upp, aðallega að undirlagi Zeev Jabotinsky – sem er réttnefndur faðir Likudflokksins – og fól í sér að beita skyldi íbúana sem fyrir voru á svæðinu ítrustu hörku, hræða þá og ræna þá sjálfstraustinu, til að fá þá til að beygja sig undir vald gyðingaríkisins.

Þessi stefna er enn við lýði – og merkilegt að fylgjast með því hvernig henni er beitt stundum; á sama tíma og eiga að vera í gangi friðarviðræður er ísraelski herinn að sprengja og drepa í Gaza, fyrir utan að taka af rafmagn og stöðva matvælaflutninga.