Óhætt er að segja að fjórir farþegar sem pöntuðu sér far með skutlþjónustunni Lyft hafi misst andlitið þegar þeir sáu hver var undir stýri á bílnum sem þeir pöntuðu.
Undir stýri var enginn annar en stórleikarinn Will Smith sem birti á dögunum myndband af þessu skemmtilega uppátæki á YouTube. Smith var staddur í Miami á Flórída þar sem hann kynnti nýjustu mynd sína, Bad Boys for Life.
Smith var ekki á neinu smá ökutæki, splunkunýjum Porsche Taycan-lúxusbíl. Myndbandið skemmtilega má sjá hér að neðan en þar má meðal annars sjá Smith bregða á leik með farþegum og fá þá til að fara með línur úr myndinni. Þessir fjórir heppnu farþegar fengu ekki bara far með Will Smith því þeir munu einnig ferðast frítt með skutlþjónustunni næsta árið.
