Heimildarmaður tímaritsins Us Weekly segir Meghan Markle allt aðra manneskju síðan hún ákvað að flytja til Kanada með eiginmanni sínum, Harry Bretaprins, og segja skilið við bresku konungsfjölskylduna.
„Hún er hæstánægð með að hafa flúið ringulreiðina í London,“ segir heimildarmaðurinn. „Henni líður eins og nýrri manneskju.“
Meghan og Harry yfirgáfu Bretlandi í janúar ásamt tíu mánaða gömlum syni sínum, Archie, eftir að þau tilkynntu um brotthvarf sitt úr bresku konungsfjölskyldunni. Þau sneru stuttlega aftur í byrjun mars að beiðni Elísabetar Bretadrottningar en sneru síðan aftur til Kanada.
Heimildarmaður Us Weekly segir að Meghan hafi tekið gleði sína á ný eftir flutning til Kanada. Hann bætir við að hún hafi fengið innilokunarkennd að búa í London með Harry.
„Hún þorði varla að stíga út fyrir hússins dyr vegna neikvæðu athyglinnar sem hún fékk,“ segir heimildarmaðurinn og bætir við að Meghan hafi iðulega fengið kvíðaköst.
Nánar er fjallað um líðan Meghan í nýjasta tölublaði Us Weekly.