Tabria Majors er fyrirsæta í yfirstærð (e. plus-size). Hún er 104 kíló og vísar staðalmyndum um feitt fólk á bug.
„Ég er frekar sterk. Ég er mjög stolt af því,“ segir hún í viðtali við Women‘s Health Magazine.
„„Þú ert svo heppin að þú þarft ekki að hreyfa þig,“ og „Oh, ég vildi óska þess að ég gæti líka alltaf verið að borða skyndibitamat,“ er brot af því sem ég fæ að heyra á tökustað vegna þess að ég er fyrirsæta sem er 104 kíló. En þessar staðalmyndir eru ekki sannar, ég er ekki löt eða kyrrsetukona, og ég kann ekki að meta að fólk gerir ráð fyrir því að ég sé það,“ segir Tabria.
„Fólk heldur að vegna þess að ég sé stór, þá hreyfi ég mig ekki. En ég er frekar sterk og er mjög stolt af því. Líkami minn er öflugur og ég vil viðhalda þessum vöðvamassa,“ segir hún.
„Í myndatökum fyrir íþróttaklæðnað eru fyrirsætur í minni stærðum látnar hlaupa um og sparka í loftið. Á meðan er ég beðin um að ganga, eða gera framstig. Ég er alveg: „Ókei en get ég fengið ketilbjöllu eða sippuband? Get ég gert eitthvað?“
Tabria segir að hún myndi vilja sjá fyrirsætur í yfirstærð fá sömu tækifæri og aðrar fyrirsætur.
„Ég vil sjá fyrirsætur í yfirstærð gera alvöru æfingar. Ég vil sjá þær svitna á tökustað. Ég vil sjá þær svitna á myndunum. Ég vil sjá þær móðar alveg eins og fyrirsætur í minni stærðum,“ segir Tabria.
„Í mörg ár hafa fjölmiðlar gefið okkur þá hugmynd að feitt er rangt, stórt er rangt, þú getur ekki gert neitt. En ég er hér til að breyta því.“