Ástralski áhrifavaldurinn Tammy Hembrow lenti í því óheppilega atviki að hakkarar tóku yfir Instagram-síðu hennar.
Skyndilega fóru að birtast furðulegar færslur í Instagram Story hjá henni þar sem fylgjendum var lofað 46 mínútna langt kynlífsmyndband af henni í skiptum fyrir að niðurhala smáforriti.
Sagt var að ef 40 þúsund manns myndu niðurhala forritinu færi kynlífsmyndbandið í loftið. Svo var einnig deilt færslu þar sem kom fram að „Tammy“ væri að gefa tvö þúsund stykki af iPhone 11 pro og voru rúmlega tíu milljón fylgjendur hennar hvattir til að næla sér í einn með því að fara inn á ákveðið vefsvæði.
Hins vegar var aldrei til nein kynlífsupptaka til að byrja með, og ekki heldur símar. Ekki er alveg komið á hreint hvað hakkararnir voru að reyna að gera með því að fá fylgjendur Tammy til að niðurhala forritinu, en það er nú búið að eyða öllum skrýtnu færslunum út af síðu hennar.
Tammy tjáði sig um atvikið í Instagram Story í gær: „Sá sem hakkaði mig í gærkvöldið, þú sökkar.“
