Bandaríski rapparinn T.I. er búinn að gera allt brjálað eftir að hann viðurkenndi að hann fer með 18 ára dóttur sína árlega til kvensjúkdómalæknis til að athuga hvort meyjarhaftið sé enn til staðar. Rapparinn sagði frá þessu í hlaðvarpsþættinum Ladies Like Us sem kom út á þriðjudaginn síðastliðinn.
Sjá meira: Rappari fer með dóttur sína til læknis til að athuga hvort hún sé hrein mey
Kynfræðingurinn Sigga Dögg tjáði sig um málið á Facebook-síðu sinni en þar segist hún vilja leiðrétta mýtuna sem er á bakvið meyjarhaftið. „Í ljósi umræðunnar um T.I. og árlega „meyjarhafts“ tjékkið sem hann lætur dóttur sína ganga í gegnum finnst mér réttast að leiðrétta mýtuna um meyjarhaftið! Dreifist sem víðast svo þetta kjaftæði hætti!!,“ sagði Sigga og birti með þessu mynd úr bókinni sinni, Kjaftað um kynlíf, til að útskýra mál sitt. Hér fyrir neðan má sjá textabrotið sem Sigga deilir með fylgjendum sínum.
„Hér áður fyrr var heil og órofin himna talin þekja meyjarhaftið og sanna að kona væri „hrein/óspjölluð“ og að blóð yrði sýnilegt þegar hún rifnaði við fyrstu samfarir. Svona er þetta alls ekki. Meyjarhaftið er teygjanleg slímhimnufelling, 1-2 sentimetrum fyrir innan leggangaopið. Það getur verið erfitt að sjá það með berum augum en útlit himnunnar er einstaklingsbundið; getur verið glært, fölbleikt eða hvítleitt. Hún getur enn fremur verið óregluleg í lögun, en sumar píkur eru með meyjarhaft sem hylur leggangaopið að hluta til, alveg eða alls ekki.
Það getur teygst á meyjarhaftinu við samfarir og ekki þarf að rjúfa það til að geta stundað sjálfsfróun eða samfarir því það hylur ekki leggöngin. Eins getur það ekki rifnað við líkamlega áreynslu, því himnan er svo teygjanleg auk þess að vera nokkra sentímetra inni í leggöngunum. Ef píkan er með himnu sem umlykur alveg leggangaopið og viðkomandi getur ekki rofið það sjálf, gæti þurft að leita til læknis til að láta rjúfa það. Það þarf að gera svo viðkomandi geti haft tíðir, notað túrtappa og/eða stundað kynlíf með örvun inni í legg0ngum. Þegar eitthvað eða einhver fer inn í leggöngin þá geta myndast rifur í himnuna og blætt úr henni og því geta fylgt óþægindi. Þessar rifur gróa yfirleitt á innan við sólarhring“