Í samtali við DV segir Marta að dóttir sín hafi viljað eignast kött nánast alla sína ævi. „Þetta er búið að vera óskalistanum í afmælisgjöf og jólagjöf í að verða 6 ár,“ sagði Marta en dóttir hennar er hæstánægð með köttinn sem hún fékk í gær.
„Hún hefur viljað kött síðan hún var um 2 ára en ég hafði alltaf bara sagt nei. Síðan eiginlega ákvað ég þetta bara á sunnudaginn, þá fékk ég þessa hugmynd. Svo bara fékk ég gefins kettling á mánudeginum og sótti hann bara í gær.“
Dóttir hennar hágrét af gleði þegar hún gerði sér grein fyrir því hvað var að gerast enda var hana búið að dreyma um þetta augnablik í mörg ár. Kötturinn hefur fengið nafn og heitir Kolur Björn Möller. Dóttir Mörtu vaknaði eldsnemma í morgun til að hugsa um köttinn sinn.
„Hún vaknaði bara klukkan fimm í morgun til að hugsa um hann, gefa honum að borða, hjálpa honum að drekka og setja hann í kattarsandinn.“
Marta sendi DV afar hjartnæmt myndband af því þegar dóttir hennar fékk köttinn og má nánast fullyrða að myndbandið geti brætt hjartað í hverjum sem er. Myndbandið má sjá í spilaranum hér fyrir neðan.
[videopress lztyqdmo]