Áheyrnarprufur í þáttunum America‘s Got Talent eru í fullum gangi, en það má með sanni segja að eftirminnilegasti keppandinn sem hefur stigið á sviðið sé hinn 22ja ára gamli Kodi Lee.
Kodi er blindur og einhverfur og var fylgt á stóra sviðið af móður sinni, Tinu. Þegar að Kodi sagðist ætla að syngja og spila á píanó runnu tvær grímur á dómarana, Gabrielle Union, Julianne Hough, Howie Mandel og Simon Cowell. Þegar að Kodi settist við píanóið og þandi raddböndin áttu dómararnir ekki til orð.
Eins og sést í meðfylgjandi myndbandi var ekki þurrt auga í salnum þegar að Kodi spilaði og söng og hafði fyrrnefnd Julianne það á orði að hún gæti ekki hætt að gráta.
