Brasilísku fyrirsætunni Nathaliu Soliani hafa borist ansi ógnvekjandi skilaboð á samfélagsmiðlinum Instagram, en Nathalia er kærasta knattspyrnukappans Rúriks Gíslasonar.
Nathalia birtir skjáskot af einkaskilaboðunum í sögu sinni á Instagram. Þar sést aðdáandi Rúriks spyrja Nathaliu hvort hún vilji deila Rúrik, því téður aðdáandi sé ástfanginn af honum. Þegar Nathalia svarar ekki verður aðdáandinn illur.
„Svaraðu mér heimskingi. Ég hata þig tík. Þetta er kærastinn minn. Ég veit að þú ert hrædd við mig,“ stendur í skilaboðunum.
Nathalia er hins vegar hvergi bangin og segir að öll skilaboð í þessum dúr verði tilkynnt til Instagram.
„Lífið er mikið meira en samfélagsmiðlar. Ef þið hafið ekkert gott að segja viljið þið vinsamlegast halda ykkur fjarri síðunni minni,“ skrifar fyrirsætan. „Heimurinn þarf virkilega á ást að halda núna, ekki hatri. Guð blessi ykkur,“ bætir hún við.
Fjölmiðlar komust fyrst á snoðir um samband Nathaliu og Rúriks í lok síðasta árs, en alvarleiki virðist vera kominn í sambandið, samanber skilaboð Nathaliu til Rúriks á Valentínusardaginn þar sem hún sagðist elska hann.
