Liverpool á að fá Cole Palmer til að leysa Mohamed Salah af, fari Egyptinn í sumar. Þetta skrifar Jeremy Cross, ritstjóri íþróttadeildar Daily Star í pistli í blað dagsins.
Palmer er besti leikmaður Chelsea, en hann kom til liðsins frá Manchester City fyrir síðustu leiktíð. Fékk hann lítið að spila á Etihad en hefur heilt yfir slegið í gegn síðan hann flutti til London.
Cross vill meina að nú sé tíminn til að taka næsta skref. Það gæti verið á Anfield ef Salah yfirgefur Liverpool í sumar. Kappinn er að eiga stórkostlegt tímabil en verður samningslaus í sumar.
„Það bíður Palmer ekkert meira spennandi en ferðalag til Póllands í Sambandsdeildinnni og að hjálpa Chelsea að ná Meistaradeildarsæti. Það er ekki ásættanlegt fyrir mann með þessa hæfileika,“ skrifar Cross.
„Hann fór frá City til að fá spiltíma og hann hefur fengið hann. En hann er of góður fyrir Chelsea og þarf að finna lið sem er í hans gæðaflokki. Ef Mohamed Salah fer frá Liverpool væri hann fullkominn arftaki.“
