Kyrylo Budanov, yfirmaður leyniþjónustu úkraínska hersins, segir að Norður-Kórea sé nú að undirbúa að senda liðsauka til Rússlands. Nú þegar hafa um 11.000 norðurkóreskir hermenn verið sendir til að berjast við hlið rússneskra hermanna.

Budanov sagði þetta í samtali við miðilinn The War Zone. Hann sagði að nú muni Norður-Kórea aðallega senda hermenn sem sjá um flugskeytakerfi og KN-23 skammdræg flugskeyti en Rússar hafa fengið slík vopn frá Norður-Kóreu.

Reiknað er með að norðurkóresku hermennirnir muni einnig þjálfa rússneska hermenn í notkun þessara vopna.

Budanov sagði að líklega verði ekki margir fótgönguliðar sendir til Rússlands að þessu sinni.