Össur skrifaði pistil á Facebook-síðu sína í gærkvöldi þar sem hann fjallaði um viðtal Stefáns við Kristrúnu í Spursmálum, en Stefán hefur vakið athygli fyrir að sauma hressilega að viðmælendum sínum og gefa ekki tommu eftir.
Í færslu á Facebook-síðu sinni segir Össur:
„Moggahaukurinn Stefán Einar mætti ofjarli sínum í Spursmálum Moggans í dag þar sem Kristrún Frostadóttir tók hann í netta kennslustund um auðlindagjöld. Hún rak sömuleiðis snyrtilega ofan í hann síbylju Moggans um að stefna hennar feli í sér stórfelldar skattahækkanir. Þegar kom að hinu fræga „ehf-gati“ sem Mogginn telur munu stórauka skatta á pípara, hárgreiðslukonur og smiði, afgreiddi hún það með einni skilmerkilegri setningu,“ segir Össur og heldur áfram:
„Á það tiltekna mál rak hún svo smiðshöggið með því að upplýsa Stefán um að nákvæmlega sama tillaga og Samfylkingin hefur viðrað – og verndar einmitt ofangreindar stéttir með sérstöku frítekjumarki – var óvart unnin og kynnt af leiðtoga lífs hans, Bjarna Benediktssyni, í fjármálaráðherratíð hans,“ segir Össur en taka skal fram að hann er kannski ekki alveg hlutlaus, enda var hann fyrsti formaður Samfylkingarinnar og sat á þingi fyrir flokkinn í mörg ár.
Össur sér þó ástæðu til að hrósa Stefáni Einari og segir hann mega eiga það að hann sé orðinn beittasti þáttastjórnandinn í íslenskum miðlum.
„Í samanburði við hann eru flestir hinna eins og værukærar mélkisur. Hann lærir heima og undirbýr sig vel, sem fæstir hinna nenna. Hann er útsmoginn að því marki, að þegar hann kemst ekkert með viðmælenda sinn, einsog Kristrúnu í dag, þá notar hann það gamalkunna bragð að trufla sífellt flæðið með innskotum, reynir að leggja viðmælanda orð í munn eða trufla með nýjum spurningum.“
Össur segir að þetta hafi hins vegar ekki virkað á Kristrúnu og bætir við að honum hafi stundum fundist sem hún setti hann „på plads“ eins og móðir sem er orðin þreytt á sífrinu í stráknum sínum.
„Skattastaglið, þar sem hann komst ekkert áfram, hefur þó líklega fengið marga til að hætta áhorfi. En þar skein Kristrún – enda yfirburðamanneskja um allt sem lýtur að efnahagsmálum. Mogginn fær svo sérstakan plús fyrir að hafa þessa frísklegu þætti opna fyrir þá sem af pólitískum ástæðum treysta sér ekki lengur í áskrift…“
