Það er möguleiki á að Manchester City verði refsað í öllum keppnum á Englandi frekar en bara í ensku úrvalsdeildinni.

Frá þessu greinir Telegraph en City er undir rannsókn knattspyrnusambandsins vegna brota á fjárlögum deildarinnar.

Búist er við að komist verði að niðurstöðu á þessu ári en ef City fær hörðustu refsinguna verður liðinu sparkað úr efstu deild.

Um er að ræða sterkasta lið Englands í dag en samkvæmt Telegraph yrði City fjarlægt úr efstu deild og einnig bannað að taka þátt í FA bikarnum og deildabikarnum.

City er ásakað um að hafa brotið allt að 130 reglur deildarinnar en hvenær nákvæmlega málið verður útkljáð er óljóst.

Möguleiki er að aðeins nokkur stig verði tekin af Englandsmeisturunum en dæmt verður í málinu síðar á árinu.