Móðir Kylian Mbappe, Fayza Lamari, þénar meira en sjö leikmenn Real Madrid í hlutverki sínu sem umboðsmaður sonar síns.
Lamari, sem er fyrrverandi frönsk landsliðskona í handbolta, hefur séð um feril Mbappe frá því hann var aðeins 15 ára gamall.
Samkvæmt portúgalska miðlinum A Bola fær Lamari um 4,5 milljónir evra á ári fyrir störf sín, upphæð sem er hluti af fimm ára samning Mbappe við Real Madrid.
Hún er sögð hafa samið beint við son sinn um að fá 30 prósent af tekjum hans, sem þýðir að hún þénar meira en leikmenn á borð við Andriy Lunin, Arda Guler, Brahim Diaz og Fran Garcia.
Mbappe gekk til liðs við Real sumarið 2024 á frjálsri sölu frá Paris Saint-Germain, en Spánarmeistararnir greiddu honum um 150 milljóna evra undirskriftarbónus. Hann er jafnframt hæst launaði leikmaður félagsins, með um 600 þúsund evrur á viku.
Háar greiðslur til umboðsmanna eru algengar í boltanum í dag og undirstrikar þetta það.
