Manchester United er farið að skoða þann möguleika að kaupa Ivan Toney frá Brentford í sumar. The Athletic segir frá.

Það hefur verið nóg að gera á skrifstofu United í sumar og hafa Leny Yoro og Joshua Zirkzee þegar verið keyptir frá Lille og Bologna. Þá eru Matthijs de Ligt og fleiri sterklega orðaðir við félagið.

Þó svo að United hafi þegar fengið öflugan sóknarmann í Zirkzee er því nú haldið fram að félagið hafi rætt þann möguleika innan sinna raða að fá Toney.

Toney á aðeins ár eftir af samningi sínum við Brentford. Í síðustu viku var því haldið fram í götublaðinu The Sun að félagið hefði lækkað verðmiðann á honum þar sem ekkert félag hefði sýnt framherjanum alvöru áhuga í sumar.

Toney hefur einnig verið orðaður við Tottenham og West Ham, en nú virðist United íhuga að slást í kapphlaupið.