Manchester City er farið að sýna Jarrad Branthwaite, miðverði Everton, áhuga. The Sun greinir frá þessu.
Þessi 22 ára gamli leikmaður hefur verið orðaður við nágranna City í United í allt sumar en Rauðu djöflarnir komast ekki nálægt verðmiða Everton.
Fyrsta tilboði United upp á 35 milljónir punda var hafnað samstundis en Everton vill allavega tvöfalda þá upphæð.
City gæti nýtt sér þessa stöðu og boðið í Branthwaite en samkvæmt nýjustu fréttum er Pep Guardiola mikill aðdáandi leikmannsins.
Everton hefur verið í vandræðum með að standast fjárhagsreglur, FFP, en liggur nú ekki eins mikið á að selja Branthwaite þar sem félagið aflaði 20 milljóna punda með sölum á Ben Godfrey til Atalanta og Lewis Dobbin til Aston Villa.
Þó svo að Everton þurfi að selja meira getur félagið tekið sér meiri tíma í viðræður um Branthwaite og heimtað hærri upphæð fyrir hann.
United er farið að skoða aðra kosti ef ekki tekst að fá Branthwaite og þar er Matthijs de Ligt hjá Bayern Munchen til að mynda nefndur til sögunnar.
