Móðir fyrrum stórstjörnunnar Jerome Boateng virðist vita það að sonur sinn sé ofbeldismaður í garð kvenna, bæði líkamlega og andlega.
Boateng er leikmaður Salernitana í dag en er þekktastur fyrir tíma sinn sem leikmaður Bayern Munchen frá 2011 til 2021.
Þýski miðillinn Spiegel hefur nú birt stutt bréf sem barst frá móður Boateng er hún hafði samband við lögfræðing í Berlín.
Bréfið var sent þann 25. mars árið 2021 stuttu eftir að fyrrum kærasta Boateng, Kasia Lenhardt, tók eigið líf þann 9. febrúar sama ár.
,,Sonur minn áreitir konur líkamlega og andlega og hefur gert í mörg ár,“ sagði móðirin samkvæmt Spiegel.
,,Nú hefur Kasia Lenhardt framið sjálfsmorð og hann vill ennþá ekki sætta sig við afleiðingarnar.“
Rannsókn er enn í gangi og er möguleiki á að Boateng verði dæmdur fyrir líkamsárás í garð fyrrum kærustu sinnar.
