Þetta er eiginlega eins og atriði úr njósnamynd. Fallegar konur sem hafa það verkefni að lokka valdamikla stjórnmálamenn í rúmið. Til þess gert að hægt sé að taka kynlífið upp á myndband og nota síðar til að kúga stjórnmálamennina.

Þetta gæti verið blákaldur raunveruleiki segir Carlo Masala, hernaðarsérfræðingur, í ljósi frétta af því að Rússar hafi hlerað samskipti háttsettra þýskra herforingja. Í samtali við Bild sagði hann mjög líklega sé rússneska leyniþjónustan FSB með myndbönd af valdamiklum þýskum stjórnmálamönnum í örmum ókunnugra kvenna. Þau séu þá notuð til að kúga þá.

Masala bendir á að það sé almennt vitað að Rússar hafi lengi notað þessa taktík: „Þeir beina spjótum sínum að stjórnmálamönnum og embættismönnum í ráðuneytum. Hluti af verkefni leyniþjónustunnar er almennt að gera sálfræðilega úttekt á valdamesta fólkinu eða lægra settu til að kortleggja veikleika þess svo það sé á endanum hægt að fá það til samstarfs.“

Hann sagðist telja að rússneska leyniþjónustan eigi skaðlegt efni í formi myndbanda og ljósmynda af valdamiklum þýskum ríkisborgurum. Kynlífsmyndbönd sem séu notuð til að kúga viðkomandi.