Maðurinn var ákærður fyrir að hafa á tímabilinu 26. nóvember til 4. desember 2022 tekið við samtals 21 þúsund evrum og 10 þúsund dollurum í reiðufé frá óþekktum aðila eða aðilum.
Var maðurinn með reiðuféð, sem nam 4,5 milljónum króna, í vörslu sinni þegar hann var handtekinn í Flugstöð Leifs Eiríkssonar 4. desember 2022 á leið til Póllands.
Í ákæru kemur fram að manninum hafi ekki getað dulist að um væri að ræða ávinning af refsiverðum brotum. Þá leyndi hann upplýsingum um uppruna, eðli, staðsetningu og ráðstöfun hans.
Maðurinn mætti ekki við þingfestingu málsins og hafði ekki boðað forföll.
Dómara þótti hæfileg refsing sex mánaða fangelsi en dómurinn er skilorðsbundinn til þriggja ára. Komi til afplánunar verður gæsluvarðhald sem maðurinn sætti frá 4. til 14. desember 2022 dregið frá. Loks var manninum gert að greiða þóknun verjanda síns 870 þúsund krónur og 62 þúsund krónur í aksturskostnað.
