Íþróttavikan er á sínum stað þennan föstudaginn líkt og alltaf. Hörður Magnússon og Edda Sif Pálsdóttir fara yfir allt það helsta.

Hörður er einn dáðasti íþróttalýsandi landsins og Edda Sif er ein af stjörnum RÚV þegar kemur að umfjöllun um íþróttir.

Rætt var um kvennalandsliðið sem tryggði sér áframhaldandi sæti í A-deild Þjóðdeildarinnar með sigri á Serbíu.

„Edda var úti í Serbíu og ég lýsti fyrri leiknum, mér fannst í báðum leikjunum og sérstaklega úti þar sem Serbar réðu ferðinni frá upphafi til enda. Við erum heppin að hafa komist í gegnum þetta,“ segir Hörður.

„Mér finnst við ekki eiga nógu mikið af skapandi leikmönnum, uppspil og miðjuspilað er klossað.“

Edda segir að íslenska liðið þurfi meira en að treysta á Sveindísi Jane Jónsdóttir sem skaut liðinu áfram. „Það er ekki bara nóg að hún sé komin, það þarf meira að gerast í kring. Hún er að koma úr erfiðum meiðslum.“

Athygli vakti að viðtöl við landsliðskonurnar voru nú í hálfleik sem er nýtt. „Það eru allir leikmenn til í þetta, hingað til. Þetta er gert á HM í fótbolta.“

Edda telur að íslenska liðið sé komið langleiðina inn á Evrópumótið. „Í eðlilegum kringumstæðum þá ættum við að vera það, en við höfum dregist aftur úr. Það eru önnur lið að taka fram úr, leiðin er mun greiðari með þessum sigri.“