Úkraínsk sérsveit hefur orðið til þess að rússneskir herbloggarar beina nú harðri gagnrýni að rússneska hernum. Ástæðuna er að finna í litla úkraínska bænum Krynky sem er á austurbakka árinnar Dnipro.

Þar hefur hluta af úkraínskri hersveit tekist að halda stöðu sinni vikum saman þrátt fyrir að Rússar hafi hótað þeim með „eldhelvíti stórskotaliðs og flugskeyta“ í kjölfar þess að Úkraínumenn náðu bænum á sitt vald í nóvember.

Einn þeirra herbloggara sem lætur mest í sér heyra vegna aðgerða Rússa við Krynky er Rybar sem hefur allt frá upphafi stríðsins verið kynntur til sögunnar sem mjög hliðhollur Kreml. Það hafa til dæmis CNN og Bloomberg gert.

Samkvæmt úttekt hins óháða rússneska miðils The Bell þá naut Rybar um hríð fjárstuðnings Yevgeny Prigozhin, eiganda Wagner-málaliðahópsins, sem lést í haust.

Allt frá upphafi stríðsins hefur Rybar hrósað Vladímír Pútín og rússneska hernum í hástert. En nú er annað hljóð komið í strokkinn.

Á Telegram, þar sem Rybar er með 1,1 milljón fylgjenda, skrifaði hann að margra vikna tilraunir til að hrekja Úkraínumenn aftur til baka yfir Dnipro hafi misheppnast vegna „skriffinnsku fábjána“ og „vanhæfni“.

Hann segir að rússnesku hermennirnir í Kherson séu berskjaldaðir fyrir drónaárásum og stórskotaliðsárásum. Þá hafi Úkraínumönnum verið gefinn kostur á að senda bæði flugvélar og þyrlur inn yfir Krynky til að ráðast á Rússa að baki víglínunni.

„Við stöndum frammi fyrir allskonar vandamálum. Í sumum tilfellum versnar staðan. Staðan varðandi loftvarnir í Kherson er í flokknum, „grátum á öxl hvers annars“ skrifaði hann.