Granit Xhaka, fyrrum leikmaður Arsenal, segir að enginn nema knattspyrnustjórinn Mikel Arteta hafi viljað halda sér hjá félaginu árið 2019 þegar miðjumaðurinn virtist á barmi þess að fara annað.
Svisslendingurinn ræðir við The Athletic í nýju viðtali um málið en eins og frægt er var baulað á Xhaka á leið af velli í leik Arsenal gegn Crystal Palace 2019. Kastaði hann treyju sinni meðal annars í jörðina fyrir framan alla í kjölfarið.
Þarna var tími Unai Emery við stjórnvölinn að líða undir lok en ljóst var að hann vildi lítið með Xhaka hafa. Inn kom Arteta.
„Félagið sýndi mér litla virðingu þrátt fyrir að ég væri fyrirliði. Það var ljóst að allir vildu losna við mig sem fyrst, allir nema einn maður: Mikel Arteta,“ segir Xhaka.
„Mikel sagði mér að fara áfram en ég var ekki viss. Ég gat ekki séð mig fyrir mér spila fyrir Arsenal á ný. Ég sagði honum að ég vildi fara eitthvert þar sem stuðningsmenn bauluðu ekki á mig. En hann var svo sannfærandi.“
Xhaka endaði þó á að vera hjá Arsenal í næstum fjögur ár til viðbótar, þar til hann fór til Bayer Leverkusen í sumar.
„Í fyrsta sinn í mínu lífi tók ég ákvörðun án þess að tala við fjölskylduna mína fyrst. Ég sagði að ég myndi vera áfram. Ég sneri aftur á æfingar og það var eins og ekkert hefði í skorist.
Mikel fékk mig til að spila á stigi sem ég vissi að ég gæti alltaf. Fjórum árum síðar skoraði ég næstum þrennu (gegn Wolves í síðasta leik sínum fyrir félagið) og stuðningsmenn Arsenal sungu nafn mitt og báðu mig um að vera áfram. Þetta var algjört gæsahúðar-augnablik,“ segir Xhaka.
