Um sjöleytið í kvöld var lög­reglan kölluð til vegna slags­mála sem brutust út á bíla­planinu við ÁTVR á Dal­vegi í Kópa­vogi. Vísir greindi fyrst frá málinu en samkvæmt frétt miðilsins var sjúkrabíll einnig kallaður á vettvang og voru tveir aðilar færðir í fangaklefa vegna málsins.

Sá sem varð fyrir árásinni var Enok Vatnar Jónsson, kærasti  Birgittu Lífar Björnsdóttur, eins vinsælasta áhrifavalds landsins. Hafa sjónarvottar tjáð DV að barefli hafi meðal annars farið á loft en á meðan barsmíðunum stóð hélt Birgitta Líf sig til hliðar og fylgdist skelfd með. Í vikunni var greint frá því að parið ætti von á sínu fyrsta barni saman.

Birgitta Líf setti tilkynningu inn á Instagram-síðu sína nú fyrir stundu þar sem hún þakkaði kveðjurnar sem parinu hefur borist og greindi frá því að allir væru heilir á húfi á hennar heimili. Fullyrti hún að um líkamsárás hafi verið að ræða og þakkaði hún lögreglunni fyrir skjót viðbrögð og sagði að gerendurnir væru nú í höndum laganna varða.

Uppfært: Í frétt Vísis nú fyrir stundu kemur fram að samkvæmt heimildum miðilsins hafi árásarmennirnir verið með hníf, piparúða og hamar á sér og Enok og Birgitta hafi ekki þekkt deili á þeim.