Lögreglunni barst í dag tilkynning frá íbúa í hverfi 105 í Reykjavík um fund á beini sem hann taldi mögulega vera mannabein. Rannsókn leiddi í ljós að ekki var um mannabein að ræða.

Þetta kemur fram í dagbók lögreglu í dag en þar kennir ýmissa grasa og stóð lögregla í ströngu. Meðal annars var tilkynnt um tvo karlmenn í annarlegu ástandi í miðborginni. Voru báðir handteknir og vistaðir í fangaklefa, grunaðir um vopnalagabrot, vörslu fíkniefna, þjófnað og að fara ekki að fyrirmælum lögreglu.

Tilkynnt var um þjófnað úr bíl þar sem ýmsir munir voru teknir. Málið er til rannsóknar.

Sofandi í bíl og með barn í bílnum

Tilkynnt var um mann eða konu (kyn ekki tilgreint) sem var sofandi í bíl fyrir utan bensínstöð, og var viðkomandi með barn í bílnum. Segir síðan að málið hafi átt sér eðlilegar skýringar.

Tilkynnt var um eld í rafhlaupahjóli fyrir utan húsnæði í hverfi 105. Ekki er greint frekar frá því.

Ekið var á gangandi vegfaranda með barn í kerru og ók ökumaður síðan af vettvangi. Kerran skemmdist en ekki urðu slys á fólki. Málið er til rannsóknar.

Í Kópavogi eða Breiðholti var maður handtekinn og vistaður í fangaklefa þar sem hann er grunaður um marga þjófnaði fyrir hundruð þúsunda.