Einn hershöfðingi er horfinn, annar hefur verið fluttur til í starfi og er hugsanlega í Sýrlandi og margir af hæst settu herforingjunum eru sagðir grunaðir, eða hafi verið handteknir, í aðgerð sem gæti verið stærsta hreinsunin innan rússneska hersins áratugum saman.
Um 17 mánuðir eru liðnir frá því að innrásin hófst. Það leynir sér ekki að stríðið hefur gengið nærri rússneska hernum, allt frá fótgönguliðum, sem hafa mátt þola óhugnanlega mikið mannfall, upp til æðstu herforingjanna.
Óánægja með stríðsreksturinn virðist vera útbreidd, einnig meðal æðstu yfirmanna hersins.
Í kjölfar skammvinnrar uppreisnar Yevgeny Prigozhin og Wagnerliða í júní, þar sem þeir kröfðust þess meðal annars að Sergei Shoigu, varnarmálaráðherra, og Valery Gerasimov, æðsti yfirmaður hersins, myndu víkja úr embætti, kom berlega í ljós að mikil átök eiga sér stað á bak við tjöldin.
Besta dæmið um óánægjuna kom fram þegar Ivan Popov, hershöfðingi, gagnrýndi yfirstjórn hersins í ræðu sem hann flutti fyrir undirmenn sína. Upptaka af ræðu hans er í dreifingu á Internetinu.
Ekki leið á löngu þar til varnarmálaráðuneytið brást við ummælum hans og eftir því sem Popov segir þá fannst yfirmönnum hans, sem hann hefði í hótunum við þá. Þeir hafi því á örskömmum tíma komið því til leiðar að honum var ýtt til hliðar.
Rússneski herbloggarinn og þjóðernissinninn Mikhail Zvintjuk skrifaði í kjölfarið á Telegram að það að missa Popov, sem var mjög vinsæll meðal hermanna sinna, muni ekki bæta útlitið fyrir Rússa í Úkraínu. Hann skrifaði einnig að deilur Popov og yfirstjórnarinnar sýni vel hvað sé mikilvægast: skortur á samstöðu.
Popov er ekki eini hershöfðinginn sem hefur lent í vanda að undanförnu samhliða því að klofningurinn á milli yfirstjórnar hersins og hershöfðingjanna hefur orðið greinilegri.
Á síðustu vikum hafa fregnir borist af því að margir hershöfðingjar hafi verið handteknir. Wall Street Journal sagði nýlega að tíu hershöfðingjar hafi verið handteknir í kjölfar uppreisnar Prigozhin og að svipaður fjöldi hafi lent í fangelsi eða verið fluttur til í starfi.
Sá þekktasti er Sergei Surovikin, sem stýrði hernaðinum í Úkraínu um skamma hríð síðasta haust. Hann er mjög vinsæll meðal þjóðernissinnaðra herforingja. Moscow Times segir að Surovikin, sem hefur ekki sést vikum saman, sé í haldi og hafi verið um langa hríð.
Ekki eru allir sérfræðingar þeirrar skoðunar að til dramatísks uppgjörs komi innan hersins. Hershöfðingjum verði frekar ýtt til hliðar, fái veigaminni stöður og verði að sætta sig við að aðrir taki við stöðu þeirra. Menn sem eru með vindinn í bakið.
„Í Rússlandi eru hershöfðingjar ekki settir bak við lás og slá í tugatali. Ofurstar og majorar eru handteknir en ekki hershöfðingjar sem stýra heilu héraði eða herdeild,“ hefur rússneski miðillinn Volja eftir heimildarmanni innan leyniþjónustunnar FSB.
