Vladímír Pútín hefur oft hótað NATO-ríkjunum og sagt þeim að „leika sér ekki að eldinum“ en þó án þess að vera mjög nákvæmur í orðum um hvað hann hefur í hyggju. En í ræðu, sem hann flutti á föstudaginn á efnahagsráðstefnu í St Pétursborg, varð hann skyndilega mjög skýr í máli og hafði í beinum hótunum við þau vestrænu ríki sem íhuga nú að láta Úkraínumönnum F-16 orustuþotur í té.

Jótlandspósturinn hefur eftir Claus Mathiesen, hernaðarsérfræðingi við danska varnarmálaskólann, að í hótuninni felist hætta á að stríðið breiðist út og stigmagnist.

Pútín kom fram á ráðstefnunni til að ræða um rússnesk efnahagsmál en ekki leið á löngu þar til hann beindi orðum sínum að stríðinu í Úkraínu. Í lokin á þeirri umræðu beindi hann orðum sínum að vestrænum bandamönnum Úkraínu og NATO og ræddi um hugsanlega afhendingu á F-16 vélum til Úkraínumanna.

Hann sagði að það að láta Úkraínu fá slíkar vélar muni valda „alvarlegri hættu á að NATO dragist enn frekar inn í átökin á milli Rússlands og Úkraínu“. Hann sagði einnig að hann sé reiðubúinn til að láta vélarnar „brenna“, hvort sem þær enda í Úkraínu eða eru á leið til Úkraínu og jafnvel þótt þær séu á NATO-svæði.

Bein rússnesk árás á NATO-ríki virkjar fimmtu greinina svokölluðu, hinn svokallaða skyttueið sem kveður á um að árás á eitt NATO-ríki sé árás á þau öll. Greinin skuldbindur önnur NATO-ríki til að bregðast við ef ráðist er á eitt þeirra.

Claus Mathiesen tjáði sig um færslu The Moscow Times um málið og sagði að það væri heimskulegt af Rússum að gera árás á F-16 vélar á yfirráðasvæði NATO. Það myndi valda hættu á að stríðið myndi breiðast út og stigmagnast. „Það held ég að menn viti einnig í Kreml,“ skrifaði hann.