Vísindamenn hafa uppgötvað 62 ný tungl á braut um Satúrnus og eru þekkt tungl plánetunnar því orðin 145. Þetta þýðir að skammvinnum en glæsilegum tíma Júpíters á toppi listans yfir þær plánetur sem eru með flest tungl er lokið.

Vitað er með vissu að 95 tungl eru á braut um Júpíter en í desember uppgötvuðu vísindamenn 12 ný tungl á braut um þennan gasrisa. Þar með tók Júpíter fram úr Satúrnusi hvað varðar fjölda tungla. En nú þarf Júpíter að víkja úr toppsætinu.

Satúrnus er fyrsta og eina plánetan í sólkerfinu sem vitað er að er með meira en 100 tungl á braut um sig.

Það voru vísindamenn við University of British Columbia sem uppgötvuðu nýju tunglin og komu Satúrnusi á toppinn á nýjan leik.

Vísindamennirnir notuðust við gögn frá Canada–France–Hawaii stjörnusjónaukanum, sem er á toppi Mauna Kea, frá 2019 til 2021.