Bæjarráð Reykjanesbæjar leggst alfarið gegn því að skemmtistaðurinn LUX við Hafnargötu í Reykjanesbæ verði veitt tímabundið atvinnuleyfi. Þetta kemur fram á vef Víkurfrétta en skemmtistaðnum, sem er í eigu plötusnúðsins og athafnamannsins Óla Geir Jónssonar, var lokað skyndilega um síðustu helgi vegna skorts á tilskyldum leyfum.
Fyrirhugað var að halda þar einkasamkvæmi og tónleika með tónlistarmanninum Flóna en þegar gesti bar að var búið að loka staðnum og þurfti að færa veisluna annað.
Skemmistaðurinn var opnaður í apríl í fyrra og fékk þá ótímabundið áfengisleyfi. Það var afturkallað þann 13. mars síðastliðinn og hafði staðurinn því verið rekinn án leyfa síðan þá. Ekki kom fram í síðustu viku hvers vegna leyfið var afturkallað en í umsögn bæjarráðs kemur fram að vegna sögu eftirlitsaðila viðburðar væri það ámælisvert að veita stað Óla Geirs tækifærisleyfi.
Bæta þurfi eftirlit við viðburði staðarins, endurbæta húsnæði og umhverfi og þá þurfi að gæta betur að aldurstakmari gesta. Þá hafi sífelldar kvartanir nágranna vegna umgengni og hávaða síðustu mánuði sitt að segja.
Í ljósi ofangreinds lagðist Bæjarráð því alfarið gegn því að þetta tækifærisleyfi yrði veitt.
