Knattspyrnugoðsögnin Robin van Persie telur að Arsenal verði enskur meistari í vor.
Hollenski sóknarmaðurinn lék með Arsenal um árabil en fór til Manchester United eftir að hafa raðað inn mörkum tímabilið 2011-2012.
„Það er á þessum tímapunkti sem hvert stig skiptir virkilega miklu máli,“ segir Van Persie, sem varð enskur meistari með United 2013.
Arsenal er með átta stiga forskot á Manchester City á toppi deildarinnar, en síðarnefnda liðið á leik til góða.
„Þeir hafa átt nokkra erfiða leiki en þeim tókst samt að ná í þrjú stig. Það er það sem meistaralið gera. Þeir hafa sannað sig en það er alltaf erfiðast að sigla þessu heim í lokin. Það verður athyglisvert að sjá hvað gerist.“
Van Persie er allt annað en vinsæll hjá stuðningsmönnum Arsenal eftir að hafa farið yfir til United. Það kemur því einhverjum á óvart að hann segist samgleðjast liðinu ef það stendur uppi sem sigurvegari.
„Persónulega held ég að þeir muni vinna deildina. Það er langt síðan svo ég yrði glaður fyrir þeirra hönd.“
