Serge Aurier spilaði þremur dögum eftir að bróðir hans var myrtur í Frakklandi en hann segir sjálfur frá þessu.
Bróðir Serge, Christopher, var skotinn til bana í júlí árið 2020 en þá var sá fyrrnefndi á mála hjá Tottenham.
Flestir hefðu tekið sér mun lengri tíma í að syrgja fjölskyldumeðlim en Aurier vildi sýna styrk sinn og spilaði í 3-1 sigri gegn Newcastle.
Í dag er Aurier leikmaður Nottingham Forest og hefur tjáð sig um mjög erfiðan tíma.
,,Ég spilaði fyrir móður mína. Hún þurfti að vita af því að lífið heldur áfram. Við misstum bróður minn sem við elskuðum svo heitt,“ sagði Aurier.
,,Ég vildi fyrst og fremst spila þennan leik því þetta er vinnan mín. Eftir það þá erum við með okkar líf og fjölskyldur.“
,,Þetta var erfiður tími fyrir mig en ég er sterkur og vildi sýna mömmu það. Já við misstum bróður minn en þú átt annan strák í þessu lífi.“
