Guðni Halldórsson, formaður Landsambands hestamanna og íbúi á Skrauthólum 2 við Esjurætur, gerir athugasemdir vegna níðstangaratriðis í áramótaskaupinu. Segja má að Guðni og eiginkona hans séu fyrirmyndir að hjónum sem birtast í eftirminnilegu atriði í skaupinu. Hjónin segjast þar vilja kaupa glæsilegan hest, taka af honum hausinn og reisa níðstöng á lóð nágranna sinna.
Atriðið vísar í fréttamál frá síðasta vori þar sem tekist var á um starfsemi Sólsetursins á Skrauthólum. Reist var níðstöng hjá Sólsetrinu í lok apríl og var hesthöfuð á stönginni.
Guðni segir að hann og eiginkona hans taki sig ekki alvarlega og sjái spaugilegar hliðar á flestu. Hins vegar sé umrætt atvik svo alvarlegt að þeim þykir nauðsynlegt að koma því á framfæri að þau hafi engan þátt átt í því að reisa níðstöngina. Einnig hafi níðstöngin ekki beinst gegn þeim. Þetta kemur fram í Facebook-færslu hjá Guðna og vill hann koma fimm athugasemdum á framfæri vegna atriðisins í skaupinu:
-
- Við áttum engan þátt í þessum verknaði eins og flestir vita.
- Það að vakna með hesthaus á priki fyrir framan húsið sitt er árás á heimili, friðhelgi og einkalíf. Við upplifðum þetta sem ofbeldi og hótun sem olli hræðslu, óöryggi, kvíða og vanlíðan á heimilinu sem enn sér ekki fyrir endann á.
- Verknaðinum var ekki beint gegn okkur hjónum (þó að við höfum talið svo vera í fyrstu) eða öðrum sem búa í löglegu, skráðu húsnæði á Skrauthólum heldur vorum við einfaldlega “í skotlínunni”
- Samkvæmt okkar upplýsingum frá þeim sem framkvæmdu verknaðinn þá snérist þetta ekki um að vera á móti trommandi hippum í sveitinni. Heldur því að af þeirra sögn að vekja athygli á að „þarna var verið að misþyrma og beita fólki alvarlegu ofbeldi, þar á meðal kynferðislega og bjóða börn inn í það umhverfi”. Það gleymist, að þeirra sögn, hversu ógeðslegt ofbeldið var og fékk að grassera þar í mörg mörg ár.
- Grín um að verið sé að kaupa fallegan hest til að sarga af honum hausinn er líka eitthvað sem okkur hestafólki finnst flestu tæplega fyndið.
