Frá 2016 til 2019 var skimað fyrir forstigi mergæxlis hjá 75.000 manns. Þátttakendunum var fylgt eftir frá 2017 þar til nú. Niðurstöður rannsóknarinnar, sem heitir Blóðskimun til bjargar, eru sagðar munu hafa mikil áhrif á greiningu á forstigi mergæxlis og geti forðað mörgum frá óþarfa áhyggjum út ævina.
Fréttablaðið skýrir frá þessu í dag og hefur eftir Sigurði Yngva Kristinssyni, prófessor í blóðsjúkdómum við Læknadeild HÍ og sérfræðingi við Landspítalann, að fram að þessu hafi fólk verið að greinast með forstig mergæxlis sem það var í raun aldrei með, það hafi hins vegar verið með skerta nýrnastarfsemi.
Hann vísar þarna til niðurstöðu rannsóknarinnar sem var samstarfsverkefni Háskóla Íslands, Landspítalans og Krabbameinsfélags Íslands. Niðurstöður rannsóknarinnar hafa verið birtar í tímaritinu Blood Cancer Journal.
„Við sáum að hjá þeim sem voru með skerta nýrnastarfsemi, sem er tiltölulega algengt, var skilgreiningin á forstigi mergæxlis hreinlega röng. Gamla skilgreiningin, sem allur heimurinn hefur stuðst við, tók ekkert tillit til nýrnastarfsemi,“ er haft eftir Sigurði.
Hann sagði í flestum tilfellum hafi fólk verið ofgreint en einnig hafi verið dæmi um vangreiningu. Niðurstaða rannsóknarinnar mun að hans sögn verða til þess að forða mörgum frá óþarfa áhyggjum út ævina. „Það þyrfti ella að taka af þessu fólki mergsýni, taka röntgenmyndir af beinum og fylgjast með hvort það þrói með sér krabbamein,“ sagði hann.
