Á lista yfir þjónustuaðila í brunavörnum á heimasíðu Húsnæðis- og mannvirkjastofnunar – HMS – er að finna fyrirtækið Protak ehf, sem sérhæfir sig í brunaþéttingum og hljóðvarnarkerfum. Á vef stofnunarinnar eru þjónustuaðilar taldir upp í stafrófsröð, sjá hér.
Þegar komið er að fyrirtækinu Protak á þessum lista og smellt er á dálkinn „skoða starfsleyfi“ blasir hins vegar bara við tilkynning um að síðan finnist ekki, sjá hér.
Samkvæmt heimildum DV hefur verið mælt með starfsemi Protak á námskeiðum á vegum HMS. Eigandi Protak ehf, Jón Arnar Pálmason, á að baki langan lista af gjaldþrotum og kennitöluflakki, og í flestum eða öllum tilvikum er um að ræða fyrirtæki í sömu starfsemi, þ.e. brunaþéttingum og hljóðvörnum.
Jón Arnar er margdæmdur fyrir skattsvik og á núna yfir höfði sér dóm vegna stórfelldra skattsvika.
Eins og DV greindi frá fyrr í mánuðinum hefur héraðssaksóknari ákært Jón Arnar Pálmason, sem er 72 ára gamall, fyrir skattsvik í rekstri einkahlutafélagsins K.S.K. 177 ehf. Félagið hefur verið tekið til gjaldþrotaskipta en meint skattamisferli Jóns Arnars varðar rekstrarárin 2020 og 2021.
Jón er sakaður um að hafa ekki staðið skil á virðisaukaskattgreiðslum fyrir um 46,5 milljónir króna og ekki staðið skil á opinberum gjöldum fyrir 26,6 milljónir króna. Meint skattsvik nema því yfir 70 milljónum króna. Málið var þingfest fyrir Héraðsdómi Reykjavíkur þann 18. október síðastliðinn.
Þetta er engan veginn eina skattsvikamálið sem Jón er bendlaður við. Í frétt Vísis árið 2015 var hann sagður vera „margdæmdur skattsvikari“ en þá var hann dæmdur í 18 mánaða fangelsi fyrir vanskil á virðisaukaskatti í rekstri félagsins Protak. Nam vangoldinn virðisaukaskattur 15 milljónum króna. Áður hafði hann hlotið skilorðsbundna dóma fyrir skattsvik árin 2011 og 2012.
Eins og fyrr segir er Jón ákærður fyrir fjársvik í rekstri fyrirtækisins K.S.K. 177 ehf, en það fyrirtæki er núna í slitameðferð, var afskráð fyrr á þessu ári. Það var stofnað árið 2016 og hét þá Protak eld og hljóðvarnir ehf. Á þessu ári var nafni fyrirtækisins breytt í K.S.K. 177 ehf.
Jón lét gjaldþrotið ekki á sig fá og stofnaði þegar í stað Protak ehf sem er í starfsemi núna og HMS mælir með á vef sínum. Árið 2009 rak Jón fyrirtæki með nákvæmlega sama nafni en í upphafsstöfum: PROTAK ehf. Eftir því sem DV er kunnugt um er fyrirtækjalisti Jóns eftirfarandi:
2008 Jóntak ehf
2009 PROTAK ehf
2011 Ideal fasteignir ehf
2012 Protak verktakar ehf
2016 Protak eld og hljóðvarnir ehf breyttist í K.S.K 177 á þessu ári
2022 Protak ehf
Öll þessi fyrirtæki eru farin í þrot og afskráð nema Protak ehf, sem stofnað var á þessu ári, beint í kjölfar gjaldþrots K.S.K. 177.
