Kerch-brúin, sem tengir Krím við meginland Rússlands, er eiginlega sjálft tákn innlimunar Krímskagans í Rússland. Sprengingin á brúnni á laugardaginn særir því stolt Rússa og þá sérstaklega Vladímír Pútíns, forseta, sem hafði sjálfur yfirumsjón með byggingu hennar en verkið fól hann æskufélaga sínu frá St Pétursborg án útboðs.

Alexander Tetzlaff, majór og hernaðarsérfræðingur hjá miðstöð hernaðarrannsókna við Kaupmannahafnarháskóla, segir að sprengingin geri Rússum erfitt fyrir á mörgum sviðum og erfiðara fyrir við að ná árangri á suðurhluta vígvallarins. Í samtali við TV2 sagðist hann telja að með árásinni á brúna hafi verið reynt að hafa áhrif á vilja Rússa til að standa í stríði í Úkraínu. Sprengingin skapi bæði ótta og óöryggi.

Enginn hefur lýst yfir ábyrgð á árásinni en Vladímír Pútín, Rússlandsforseti, hefur sakað úkraínskar sérsveitir um verknaðinn og í gærmorgun kom fyrsta svar Rússa þegar flugskeytum rigndi yfir Kyiv og fleiri úkraínskar borgir.

Tetzlaff sagði nærtækt að halda að Úkraínumenn hafi gert árásina: „Þetta er fullkomin árás sem var tekin upp og skráð. Öll heimsbyggðin talar um sprenginguna og Rússar hljóta að hugsa: „Hvar hæfa þeir okkur næst?“