Hagnaður Landsvirkjunar fyrri hluta ársins nam 19 milljörðum króna, en í fréttatilkynningu segir að afkoman hafi aldrei verið betri í sögu orkufyrirtækis þjóðarinnar.

Haft er eftir Herði Arnarsyni forstjóra í tilkynningu:

„Rekstrarniðurstaða fyrri hluta ársins var betri en nokkru sinni fyrr í sögu Landsvirkjunar. Hagnaður fyrir óinnleysta fjármagnsliði hækkaði um tvo-þriðju miðað við sama tíma í fyrra og nam rúmum 22 milljörðum króna. Þessa hækkun má einkum rekja til hækkunar á raforkuverði til stórnotenda. Rekstrartekjur hafa aldrei verið hærri á hálfsárstímabili frá stofnun Landsvirkjunar og námu 45,5 milljörðum króna.“

Hörður segir að rekstur aflastöðva hafi gengið vel á tímabilinu og eftir erfiðan fyrsta ársfjórðung, þar sem tíð óveður og erfið staða í vatnsbúskapi hafi reynt á fyrirtækið hafi vorið komið með kröftugu innrennsli og sé vatnsstaðan því nú í góðu meðallagi.

„Eftirspurn eftir raforku var með allra mesta móti á tímabilinu, en orkuafhending til stórnotenda jókst um 5% og jafnframt jókst afhending forgangsorku í heildsölu um 23%. Um leið var meðalverð til stórnotenda án flutnings hærra en nokkru sinni áður á fyrri árshelmingi, eða 42,1 dalur á megavattstund. Þetta má m.a. rekja til endursamninga undanfarinna ára, sem tryggt hafa að flestir viðskiptavinir Landsvirkjunar borga verð sem er sambærilegt við það sem gengur og gerist í þeim löndum sem við berum okkur helst saman við.“

Í tilkynningu segir að mikil eftirspurn sé eftir raforku hér á landi, eða í raun meiri heldur en framboðið.