Sigurður G. Guðjónsson lögmaður er ósáttur með dóminn í máli Ingólfs Þórarinssonar tónlistarmanns sem tapaði í gær í Héraðsdómi Reykjavíkur meiðyrðamáli sínu gegn Sindra Þór Sigríðarsyni.
„Dómari afnemur friðhelgi einkalífs og æruvernd í þágu byltingar,“ skrifar Sigurður í Facebook-færslu um málið. Segir hann að með dómnum hafi mannréttindi vikið fyrir hugmyndafræði um betri heim. Sé þetta ekki í fyrsta skipti sem slíkt gerist:
„Héraðsdómari við Héraðsdóm Reykjavíkur afnam með dómi í gær í máli Ingólfs Þórarinssonar gegn Sindra Sigríðarsyni friðhelgi einkalífs og æruvernd í nafni byltingar.
Það er ekki í fyrsta sinn sem hugmyndafræði um betri heim hefur verið talin mannréttindum æðri.
Boðskapur dómarans er sá, að í nafni tjáningarfrelsis sé sérhverjum frjálst að bera sakir á samborgara sína, troða þá niður í svaðið, hafa af þeim lífsviðurværi sitt, ef tjáandanum finnst hann vera að vinna að framgangi ríkjandi hugmyndafræði og telur sig vera að segja satt og rétt frá og getur stutt þá tilfinningu sína með framburði skoðanasystkina.“
DV fjallaði ítarlega um málið í gær. Lykilatriði í sýknunni virðist vera það að dómari fellst á að Sindri hafi ekki sakað Ingó um refsivert athæfi og kaupir dómarinn þá túlkun Sindra á orðalaginu „ríða börnum“ að þar eigi hann við það athæfi fullorðinna manna að sænga með stúlkum á aldrinum 15-17 ára. Dómari taldi einnig að vegna umfangsmikillar umræðu í samfélaginu um þetta meinta athæfi Ingó megi færa rök fyrir því að Sindri hafi verið í góðri trú er hann lét ummæli sín falla.
