Bára skrifaði pistil um málið í vikunni og útskýrir í þættinum hvers vegna hún ákvað að skrifa hann. Bæði þingflokksformaður VG og framkvæmdastjóri þingflokksins tjáðu sig um þessi orð og sögðu að um hatursorðræðu væri að ræða. Þarna var ég bara ósammála því mér finnst að við eigum að taka hugtök alvarlega og hvernig við notum þau. Hugtakið hatursorðræða er mjög vel skilgreint og því fannst mér ástæða til þess að gera athugasemdir við hvernig þau töluðu um það,“ segir Bára.
Þá fer hún yfir skilgreininguna á hatursorðræðu og segir að mikill munur sé á hatursorðræðu og því sem séra Davíð sagði. „Þarna finnst mér vera rosalega mikill munur á því að vera dónalegur á netinu, eins og sumum fannst kannski Davíð Þór vera, en hatursorðræða var þetta ekki. Þú getur ekki verið með hatursorðræðu gagnvart stjórnvaldi, hann var að tala um flokk sem er í ríkisstjórn, mjög valdamikinn flokk.“
Björn Ingi tekur þá til máls en honum finnst Davíð hafa farið langt yfir strikið. Hann er þó sammála Báru um að ekki sé um hatursorðræðu að ræða. Björn Ingi útskýrir þá sem honum fannst ekki í lagi við færsluna hans Davíðs. „Hann sagði að það væri til sérstakur staður í helvíti fyrir þá sem seldu sál sína fyrir vegtyllur og völd. Þarna fannst mér hann ganga mjög langt,“ segir Björn Ingi.
Þá bendir hann á að Davíð hefur verið áberandi í umræðum um ríkisstjórnina en hann hélt til dæmis tölu á mótmælum vegna sölunnar á Íslandsbanka.
„Á einhverjum tímapunkti er ekkert óeðlilegt að maður velti því fyrir sér hvort Davíð Þór ætti ekki bara að vera stjórnmálamaður og láta reyna á vinsældir sínar þar, láta rödd sína heyrast þar. En ekki gera þetta sem prestur því það er öðruvísi þegar prestur segir að þú eigir víst í helvíti skilið og að ríkisstjórn Íslands sé fasistastjórn. Það er að mínu mati mikil vanvirðing við þá íbúa heimsins sem búa í fasistaríkjum, það er ekkert grín.“
