Formlegar meirihlutaviðræður í Reykjavíkurborg milli Samfylkingarinnar, Framsóknarflokksins, Pírata og Viðreisnar eru hafnar en greint var frá tíðindunum á blaðamannafundi fyrr í dag. Fundurinn fór fram í Grósku – hugmyndahúsi en þegar nokkuð var liðið á viðburðinn kom upp úr dúrnum að láðst hafði að láta húsráðendur vita af blaðamannafundinum.

Dagur B. Eggertsson, borgarstjóri, steig þá fram fyrir skjöldu og kvaðst axla ábyrð á misskilningum. Hann hafði leitað til framkvæmdastjóra Vísindagarða vegna fundarins og talið að leyfi væri þar með komið í hús.

Gróska hugmyndahús er í eigu Grósku ehf. sem er í eigu Björgólfs Th. Björgólfssonar og viðskiptafélaga hans. Húsið er inn á svæði Vísindagarða HÍ en er í einkaeigu og heyrir því ekki undir framkvæmdastjóra Vísindagarða þó samstarfið sé náið.

Sjá einnig: Hrólfur segir að Dagur hafi ekkert vitað:„Það er alveg á hreinu“

Athygli vekur að sá er gegnir því starfi og veitti Degi borgarstjóra leyfi, án þess að hafa til þess heimild, er Hrólfur Jónsson, fyrrverandi skrifstofustjóri eigna og atvinnuþróunar hjá Reykjavíkurborg, en hann tók á sig ábyrgð varðandi framúrskeyrslu á kostnaði við endurbyggingu Braggans alræmda sem vakti þjóðarathygli í lok árs 2018 enda var þar mörg hundruð milljónum af skattfé eytt umfram heimildir.

Hrólfur var nýhættur störfum hjá Reykjavíkurborg þegar hneykslismálið kom upp og því hafði hlutverk blóraböggulsins litlar afleiðingar fyrir hann. Í kjölfarið tók hann svo við starfi framkvæmdastjóra Vísindagarða sem hann gegnir enn í dag.