Lögreglan sinnir verkefnum af ýmsum toga. Lögreglan á höfuðborgarsvæðinu greinir frá því á Facebook síðu sinni að verkefni þeirra um helgina hafi verið fjölbreytt en hafi bæði menn og dýr ratað í vandræði og þarfnast aðstoðar.

„Í gærkvöld var tilkynnt um gæs við Hringbraut í Reykjavík, en óttast var að hún hefði orðið fyrir bíl. Haldið var á vettvang, en fuglinn reyndist augljóslega hafa orðið fyrir hnjaski af einhverju tagi.“

Lögreglumenn afréðu svo að skutla gæsinni heim og sneru svo aftur síðar um kvöldið til að kanna hvort enn væri í lagi með hana.

„Eftir vangaveltur var afráðið að koma gæsinni aftur „til síns heima“ og hún því færð á Reykjavíkurtjörn. Síðar á vaktinni var svo athugað aftur með „sjúklinginn“ sem hafði þá synt út á tjörnina og náð að koma sér makindalega fyrir þar í eyju. Vonandi er það vísbending um að gæsin nái að braggast vel á nýjan leik.“

Með færslunni fylgdi svo mynd af björgunaraðgerðinni sem má sjá hér fyrir neðan.