Borgarráð samþykkti á fundi sínum þann 17. mars að bjóða út framkvæmdir vegna endurnýjunar á gatna- og umhverfislýsingu árið 2022. Kostnaðaráætlun er 700 milljónir króna.

Í greinargerð segir að um sé að ræða kaup á nýjum orkusparandi LED lömpum ásamt útboði á útskiptingu þeirra. Samkvæmt áætlun verður á árinu 2022 skipt út lömpum í vesturbæ sunnan Hringbrautar, Grafarvogi, Grafarholti og í Norðlingaholti. Áætlað er að útskiptingu eldri lampa með nýjum orkusparandi LED lömpum ljúki á árinu 2023. LED væðing gatna- og umhverfislýsingar er hluti af grænum skrefum Reykjavíkurborgar.

Áheyrnarfulltrúi Miðflokksins lagði fram bókun þar sem segir meðal annars: „Götulýsingin í Reykjavík er borginni ekki til sóma. Allt frá því í september og til mánaðamóta mars/apríl ár hvert er lýsingin með þeim hætti að hún er stórhættuleg fyrir gangandi, hjólandi og akandi vegfarendur. Gríðarleg slysahætta skapast af myrkrinu sem Reykjavíkurborg er haldið í. Þá eru ótaldar hliðarverkanir sem skapast af lélegri lýsingu s.s. innbrot og ofbeldismál í miðbænum. Því er haldið fram í svari frá Reykjavíkurborg 1. október 2020 að ljósmagn skipti ekki máli, þ.e hvort lýsingin sé 20 lúx eða 50 lúx. Því er hafnað af augljósum ástæðum.“ Bókuninni lýkur með orðunum: „ Nú er verið að bæta götulýsinguna og því ber að fagna – einhversstaðar er hlustað.“

Áheyrnarfulltrúi Flokks fólksins lagði ennfremur fram bókun þar sem sagði að framkvæmdin væri sjálfsögð hún sé vörðuð mistökum í útboðum og nú þurfi að vanda til verka.