Morgunblaðið skýrir frá þessu í dag. Fram kemur að í gær hafi verið haldin æfing á vegum almannavarna vegna komu flóttafólks. „Sú æfing miðaðist við fyrstu viðbrögð ef hingað kæmi mjög stór hópur í einu. Hér er húsnæðisskortur og til að mynda skortur á leiguhúsnæði á almennum markaði. Þá þarf að búa til viðbragð og það viðbragð hefur verið í vinnslu,“ hefur Morgunblaðið eftir Gylfa.
Hann sagði mikla áherslu lagða á að útvega flóttafólkinu húsnæði. Af þeim 300 sem nú þegar eru komin til lands býr hluti hjá ættingjum og vinum en mjög stór hluti nýtir sér úrræði Útlendingastofnunar að sögn Gylfa.
Hann sagði að fyrir liggi að búsetuúrræði Útlendingastofnunar séu af skornum skammti því tugir annarra flóttamanna komi til landsins daglega. Húsnæðismálin séu stórt vandamál og því hafi verið óskað eftir því við almenning, fyrirtæki, verkalýðsfélög og sveitarfélög að leggja til íbúðarhúsnæði, jafnvel þótt það sé aðeins til skamms tíma.
