Eins og fram kom í fréttum í gær hefur Gunnar Örn Jónsson, lögreglustjóri á Vesturlandi, ákveðið að fella niður mál á hendur yfirkjörstjórn vegna talningarklúðursins í Borgarnesi í þingkosningunum síðasta haust. Björn Leví Gunnarsson, þingmaður Pírata, segir að Gunnar sé úti á túni varðandi þessa ákvörðun og málinu sé ekki lokið.

Fréttablaðið skýrir frá þessu í dag. Haft er eftir Gunnari að hann telji það ekki vandræðalegt fyrir embætti hans að nú hafi verið fallið frá því að sækja Inga Tryggvason, formann yfirkjörstjórnar, og aðra í kjörstjórninni til saka fyrir dómi en meðlimir kjörstjórnarinnar neituðu að greiða sektarboð sem lögreglustjórinn hafði sent þeim. „Nei, ég sé ekki að þetta sé vandræðaleg niðurstaða, ekki samkvæmt gildandi löggjöf,“ sagði Gunnar og vildi ekki tjá sig frekar um málið.

Hvað varðar gildandi löggjöf þá á hann við að eftir klúðrið í Borgarnesi var gerð breyting á kosningalögum sem tók gildi í upphafi þessa árs. Telur Gunnar að samkvæmt nýju lögunum segi hvergi að kjörgögn skuli vera innsigluð og brot við því varði viðurlögum en þetta er ólíkt því sem eldri lög kváðu á um.

Björn Leví Gunnarsson, þingmaður Pírata, sat í undirbúningskjörbréfanefnd sem rannsakaði klúðrið í Borgarnesi. Hann telur að ákvörðun Gunnars sé kolröng. „Honum ber að dæma eftir gildandi lögum á þeim tíma sem brotið fór fram,“ er haft eftir Birni Leví sem segist næstum orðlaus vegna þessarar niðurstöðu lögreglustjórans og segir málinu hvergi nærri lokið.