Rætt var um formannsslaginn sem framundan er í þættinum Íþróttavikan með Benna Bó, sem sýndur var á Hringbraut á föstudag. Sævar Pétursson, tilkynnti um framboð sitt gegn sitjandi formanni, Vöndu Sigurgeirsdóttur.

Vanda kom í þáttinn 433 þar sem hún fór um víðan völl og ræddi um fótbolta og sína sýn á framtíðina. Hörður Snævar Jónsson, íþróttastjóri Torgs, sem stýrir 433, sagði að hann sé að finna meðbyr með Vöndu þessa dagana miðað við þau samtöl sem hann hafi átt í vikunni.

Jóhann Alfreð Kristinsson, uppistandari og mikill íþróttaáhugamaður, segir að Vanda sé að tækla mál sem séu fordæmalaus. „Kannski hefur hún þurft þennan tíma til að liggja yfir sinni stragedíu og hvert hún ætlar. Við vitum hvernig staðan var í Laugardalnum síðsumars í fyrra.“

Hörður segir að staðan í dag sé þannig að erfitt sé að spá um komandi formannskjörið. „Fyrir viku síðan hefði ég geta sagt að Sævar væri 70 prósent líklegur til að hreppa formannsstólinn en í dag, ef ég skynja salinn rétt, þá finnst mér þetta vera algjörlega hnífjafnt og hvorugt líklegra en hitt.“

Nánari umræðu má sjá hér fyrir neðan þar sem þeir félagar spá frekar í spilin. Hvort neðri deildin sé að smala á ársþingið sem fram fer að Ásvöllum eftir slétta viku.