Að minnsta kosti þrettán jólabörn fæddust nú um jólin. Sjö fæddust á aðfangadag og sex á jóladag. Flest fæddust á fæðingardeild Landspítalans í Reykjavík eða sex á aðfangadag og fimm á jóladag. Eitt barn fæddist á fæðingardeild Sjúkrahússins á Akureyri á jóladag en ekkert á aðfangadag.

Morgunblaðið skýrir frá þessu. Fram kemur að eitt barn hafi fæðst í Keflavík á aðfangadag en ekkert á jóladag.

Engin börn komu í heiminn á Heilbrigðisstofnun Vesturlands á Akranesi og á fæðingarstofu Bjarkarinnar í Reykjavík þessa tvo daga. Eitt barn fæddist á fæðingarstofu Bjarkarinnar á Þorláksmessu.

Ekki fengust upplýsingar frá öllum fæðingardeildum landsins um fæðingar á aðfangadag og jóladag og því eru jólabörnin hugsanlega fleiri en þrettán.