Árum ef ekki áratugum saman hafa konur nýtt sér förðunarvörur til að losna við hina óæskilegu bauga sem eiga það til að myndast undir augunum af hinum ýmsu ástæðum – einkum með hækkandi aldri eða þegar við erum vansvefta. Það var einmitt í þeim tilgangi sem baugahyljarinn svokallaði varð til en slíkir eru þó almennt í dag kallaðir einfaldlega hyljarar enda ætlaðir til að hylja allskonar sem hefðbundinn farði nægir ekki á.
En nú er farið að bera á nýrri tísku hjá unga fólkinu á TikTok. Þar þykir mörgum orðið æskilegt að hafa dökka bauga og nýta farða til að búa slíka til, ef þeim er ekki fyrir að fara.
TikTok-arar hafa brúkað hin ýmsu ráð til að búa baugana til. Allt frá varalit til hyljara getur nýst til að skapa þetta góða klassíska „Ég ætti að vera sofandi núna“ útlit.
Ein þeirra fyrstu sem deildi bauga-myndbandi var Sara nokkur Carstens en af athugasemdum við færslu hennar má álykta að hér sé komin tíska sem fólkinu líkar.
„Ertu sem sagt að segja mér að eitt af því sem ég hef verið mest óörugg með í gegnum tíðina og reynt að hylja árum saman þykir núna aðlaðandi? Ég bara… ég er hamingjusöm,“ skrifar ein.
„Ég er með svakalega bauga. Ég hef alltaf verið óörugg með þá. Ef fólk nær að gera þetta að tísku þá verð ég sko upp með mér og alls ekkert móðguð,“ skrifar önnur.
„Var að frétt að fólk á TikTok er að nota farða til að búa til bauga undir augum. Loksins eru tískuguðirnir að vinna mér í hag.“
@saracarstens #duet with @sarathefreeelf #teenvogue ♬ Greek Tragedy (Oliver Nelson TikTok Remix) – The Wombats
Á YouTube hafa nokkur myndbönd úr þessu „trendi“ verið tekin saman en hafa ber í huga að þetta er aðeins lítið brot af þeim fjölda myndbanda sem hafa verið gerð á árinu um hvernig á að búa til hinu fullkomnu bauga með farða. Blaðamaður kýs þó heldur að notast við gamalt og góðkunnugt ráð – spila tölvuleiki langt fram á nótt. Hefur ekki klikkað hingað til.